“بدأت على إنستجرام والطيب تدخل”.. كيف رد عبد القادر على انتقادات السوشيال ميديا؟

07:46 م


الجمعة 04 أغسطس 2023

كتب: هند عواد

احتفل لاعب الأهلي، أحمد عبد القادر بنهاية الموسم عقب مباراة المصري، أمس، ونشر فيديو له خلفه حمام سباحة، عبر حسابه الشخصي على موقع تبادل الصور والفيديوهات “انستجرام”.

علق عبد القادر على الفيديو:” إجازة”، فرد أحد جماهير الأهلي في التعليقات: “ياعم ما أنت طول السنة إجازة، إيه الجديد أصلا”، فرد “عبد القادر”: “شوف أنا 24 سنة يا مصطفى وعملت ايه؟، وانت لسه”.

من جانبها، علقت إحدى صفحات جماهير الأهلي على موقع التواصل الاجتماعي “فيسبوك”، على رد لاعب الأهلي على أحد الجماهير، كتبت: “للسنة التانية على التوالي أحمد عبد القادر بعد نهاية الموسم مباشرة، بيفتح انستجرام ويرد على كل الناس بطريقة غريبة جدًا، سواء ناس بينتقدوا بشكل محترم، ناس بينصحوا، أو ناس بيتكلموا بشكل سئ”.

أضافت: “يا عبد القادر أنت لسة معملتش أي حاجة في الكورة لسة، أنت حققت بطولات لأنك في منظومة جماعية كبيرة، بتشتغل بأي 11 لاعب”.

أكملت: “أنت مُجبر تحترم الناس وتطور من أدائك في الملعب، بدل ما تطور من ردودك على الناس على الفيسبوك وانستجرام، أنت بدأت الموسم وأنت أساسي وختمته وأنت لاعب بديل بينزل ربع ساعة كل ماتش، وأحيانًا مبينزلش”.

اختتمت: “واضح إن فيه مشكلة فنية عندك، اشتغل عليها واشتغل على طريقتك وأسلوبك واحترم الجمهور اللي عمل اسمك، الطريق اللي إنت ماشي فيه ده نهايته مش كويسة والدور اللي بتحاول تعيشه ده مش صح، جمهور الأهلي أكبر من أي حد”.

جاء رد لاعب الأهلي على هذه الصفحة، بعدما شارك تعليقهم على صفحته الشخصية على “فيسبوك”: “جمهور الأهلي أكبر منكم، ياللي بتقبضوا الفلوس علشان تعلوا ده وتوطوا ده”.

أضاف: “أنا موسم كامل ساكت مفتحتش بوقي، ومش هفتح بس فيه وقت لازم تتقوا ربنا فيه، جو الأدمن بتاعكوا والفلوس اللي بتتوزع عليكوا وقدام عيني”.

أكمل: “حد عرض عليا أعمل حملات “هجص” ولقطة وهنعليك وهنخليك في السما ده مش عندي، أنا ربنا بيكرمني علشان أنا عارف أنا بتعب إزاي وهفضل طول عمري شريف مش بتاع ألف ألفين جنيه أبيع بيهم كرامتي”.

تابع: “بلاش إنتوا علشان انتوا لا تمسو للنادي الأهلي باي شئ، النادي الاهلي أكبر نادي في العالم مش في مصر، اللي إنتوا عايزينه ده مبعملوش، الإجازة يا أنا ياصفحاتكوا، وبقولها لآخر مرة أنا بتاع شغل مش بتاع رشاوي”.

أضاف: “وبعدين لقطة ركز جوا الملعب وسيبك منهم رد في الملعب، رد في الملعب إيه ما تنضجوا شويه لما حد بياخد فلوس، ويغلط فيك سنة كامله وأكتر ويشتم أهلك، تقولي رد في الملعب ولما ترد يقولك متركزش معاهم”.

اختتم: “مين قال إنهم فارقين معايا اصلا، ولو إنتو فعلاً عندكوا ذرة ثقة وقلبكوا كان جايبكوا، مكنش البوست اتمسح بعد ساعة على طول بس أنا اللي هنزله، صباح الفل وجمعة مباركة”.

علق أحمد الطيب، على ما حدث بين أحمد عبد القادر وإحدى صفحات جماهير الأهلي، عبر حسابه الشخصي، على موقع التغريدات “تويتر”، “أحمد عبدالقادر وضع النقاط فوق الحروف، واقتحم وواجه و فضح “مافيا” السوشيال ميديا”.

اختتم: “خيط رفيع يصل بنا إلى محطة الحقيقة، التى دمّرت ما تبقّى من طباع و عادات كانت محترمة، فرصة ذهبيّة للحسم”.