عيسى ابراهيم
** بعد غياب قسري امتد طوال فترة حرب الخرطوم واغلاق مكاتب خدماتهم بالعاصمة مثلثة الابعاد بحجة احتلال مقراتهم ومقرات منسوبيهم ويحمد لهم (اعني ناس “الكرهبا” كما يحلو نطقها بألسنة احبابنا ناس شرقنا الحبيب) انهم واصلوا في ضخ خدماتهم المهمة “التيار الكهربائي” بعد داك نقول ليكم “حمدل لالكم بالسلامة ووحشتونا والله”..كدي بردو شوية وما تفتكرو زباينكم حرامية (اها) بعد انتهاء كهربتهم مدفوعة الاجر من العدادات احتارو وضربو اخماسهم في اسداسهم وناس الكهربا في مثلثنا الخرطومي يشكلون غيابا تاما والكثيرون بارحو سكنهم بتاع الكهربا الى ملاذات امنة عند اقاربهم وبعضهم عمل “يا مسافر جوبا اوعك تنسى ياي” وقامو بارحو الخرتوم..اها فكرو في الحل وسمعو انو ممكن تاخد كهربا من بورتسودان وعند المحاولة اتضح انو الكلام دا ما ممكن والحمد لله الكهربا انسترت وما قطعت..وفجأة انقطعت الكهرباء عن العدادات بدون حل لمشكلة الدفع المقدم..اها ومن ديك وعيييك!!..
كهرباء الدفع المقدم تصحو وتنذر:
** نبهت كافة مشتركيها بفرض غرامة مالية قدرها ١٠٥ الاف جنيه كغرامة اولية وواصلت لتقول: وفي حالة الدفع وعدم تغيير التوصيل غرامة ٥٠٠ الف جنيه لكل من ثبت تورطه في توصيل مباشر من العمود أو اي توصيل عشوائي غرضه الحصول على الكهرباء بطريقة مجانية وفي حالة عدم الدفع يتم ححز الزاوية لحين السداد وقد تصل الغرامة مليون جنيه (يعني مليار جنيه بالجديد) في حالة عدم الرضوخ للقرار لثلاث مرات..ولم ينسوا ان ينوهوا لعودة نوافذ البيع المباشر للكهرباء في كافة القطاعات والاحياء والمدن بالاضافة الى التطبيقات!!..
** غايتو يا ناس “الكرهبا” قريت وما فهمت غرامة ال ١٠٥ الاف جنيه دي مفروضة لفترة غياب النوافذ ام هي غرامة للتوصيل العشوائي في فترة غيابكم غير المعلنة؟؟!..
** بالنسبة لفترة غيابكم القسري يمكن تسوية الفترة وهي تتفاوت من مشترك الى اخر نسبة الى ان البعض يشتري كهربا لفترة طويلة ويتحمل الفرق بدلا من رزق الشهر بالشهر..لذا يمكنكم وبنفس بارد ومراعاة لحالة غياب الدولة والحكومة والمؤسسات وانقطاع المرتبات والمعاشات يمكنكم ان تقدرو الفترة بناء على استهلاك كل مشترك على حدة لمدة عشرة اشهر متواصلة وتقسم على عشرة لاستخراج متوسط الاستهلاك الشهري وتضرب في فترة الغياب وتقسيط الناتج على المشترك مع الاستهلاك الشهري لمدة ثمانية اشهر مثلا ويا دار ما دخلك شر وتعود المياه الى مجاريها وهذا صوت يعلو على صوت الدانات والكلاشات والطائرات والله يجازي الكان السبب..دا اذا عاد الوطن وطنا!!..
المصدر: صحيفة التغيير
