علّق الإعلامي باسم يوسف على لقائه الشهير مع الإعلامي الأمريكي بيرس مورجان والنجاح الذي حققه هذا اللقاء، والحملة الإعلامية التي شنها الاحتلال في الغرب لمواجهة القضية الفلسطينية.
وقال باسم يوسف خلال فقرته ببرنامج كلمة أخيرة الذي يذاع على قناة on: فاكر أيام غزو العراق، كانوا مسميين حرب العراق باسم الصدمة والرعب، هما بيتبعوا نفس الأسلوب في الإعلام برضه، بيكذبوا كذبة مروعة تفزع الناس لأن ده اللي بيفضل في مخهم، ويركز على رسالة واحدة موحدة بسيطة وميسمحش بالنقاش يروح في حتى تانية، وكبر في المظلومية، وحسس الناس بالذنب لو حاولوا يسألوا عن التفاصيل.
وتابع: وعقبال بقى ما الكدبة بتتكشف يكون فات الأوان، والوضع اتغير على الأرض، وبقوا في موقف تفاوضي أفضل، ويفضل يرميلك تصريحات وتنديدات واعترافات ومكاسب وهمية، وكل ده عشان يكسبوا به وقت، ويبرروا قتلك، وكام مرة سمعنا تصريح بينيمونا من أوروبا، وأنهم وقفوا إمدادات السلاح، واحنا نهيص ونقول الله والنبي ده في كام رجل أبيض رمالنا كلام حلو، وفي الواقع مفيش حاجة بتتغير.
وقال باسم يوسف: فاكر حرب رواندا، أسوأ حرب أفريقية، وطبعا لو في ناس مصريين يكونوا متابعين وعارفين، لكن المواطن المصري العادي، هيقولك دي مشكلة بسيطة في بلد لنلاعبها كورة.
وتابع: على حسب أنت بتاخد معلوماتك منين، والناس متخيلة إننا بنبص على الأحداث من نفس الشاشة، وكأن في شاشة كبيرة كدة، والكل بيبص فيها على الحدث، لكن في شاشات كتير وعدسات كتير وزوايا كتير، وكل واحد بيخلق الحقيقة بتاعته من خلال الشاشة دي، يغرق الشاشة بقصته.
وأوضح باسم يوسف: في 7 أكتوبر هما أخدوا الطلعة الأولانية، انتشرت كل القصص البشعة اللي كانوا بيروجوها في الإعلام، واللي لغاية دلوقتي لسة مأثرة على الناس، والناس مصدقين أن في اغتصاب وأطفال اتدبحت، وإن إسرائيل عندها حق تدافع عن نفسها، لأن الأثر النفسي بالحاجات دي بيفضل للأبد.
وقال: لدرجة إن ترامب لما اتسأل من كام أسبوع عن الإبادة اللي بتحصل في غزة، وقال أنا شوفت صور لأطفال إسرائيليين مقطوعي الرأس في 7 أكتوبر.
وأضاف: الموضوع ده كان بيحصل قبل 7 أكتوبر في التاريخ الأمريكي وتم استخدامه كذا مرة لشيطنة ناس بعينهم، فتخلق موجة من الغضب، وتدي مبرر تجاههم للقضاء عليهم، وحصل مدابح لمجتمعات السود هناك وتم حرق مدنهم عشان الموضوع بدأ بإشاعة أن أسود اغتصب واحدة بيضة.
ملحوظة: مضمون هذا الخبر تم كتابته بواسطة اليوم السابع ولا يعبر عن وجهة نظر مصر اليوم وانما تم نقله بمحتواه كما هو من اليوم السابع ونحن غير مسئولين عن محتوى الخبر والعهدة علي المصدر السابق ذكرة.
انتبه: مضمون هذا الخبر تم كتابته بواسطة مصر اليوم ولا يعبر عن وجهة نظر موقعنا وانما تم نقله بمحتواه كما هو من مصر اليوم ونحن غير مسئولين عن محتوى الخبر والعهدة علي المصدر السابق ذكرة.