“كلنا مبنفهمش وحضرتك اللي خايف على مُثُل المجتمع؟”.. مدحت العدل يرد على منتقدي “ع الزيرو”
10:43 م
الأحد 06 أغسطس 2023
كتبت شهد القاضي:
رد السيناريست مدحت العدل على منتقدي فيلمه الجديد “ع الزيرو” بطولة محمد رمضان والذي يعرض حاليا بدور العرض السينمائي.
وفيما يخص القضية التي رفعها أحد الأشخاص على الفيلم قبل عرضه، رد “العدل” وقال من خلال لقائه ببرنامج الحياة اليوم مع الإعلامية لبنى عسل: “قبل ما الفيلم ينزل في ناس توقعت القصة .. إن محمد رمضان هيتبرع بعضو من أعضائه ثم يتحول لتاجر أعضاء.. هم كتبوا كده بس طبعا ده مش الفيلم، فالراجل اللي قدم البلاغ قال إزاي تخلوا نجم زي محمد رمضان يتاجر في الأعضاء؟.. بس الراجل مشافش الفيلم لأن هو مبيتاجرش ولا حاجة، ده هو طالع ضحية ناس من اللي بيتاجروا في الأعضاء”.
وأضاف: “كان نفسي اللي يقدم البلاغ ده كان يتفرج عالفيلم الأول حتى، بس في فيلم بطولة محمد رمضان وكتبه العبدلله وإنتاج العدل جروب وفيه نيللي كريم وجومانا مراد وإسلام إبراهيم، فمعناه لما تقولي أنا هرفع قضية عالفيلم إنك بتدوري على شهرة، زي اللي بيرفع قضية على عادل إمام عشان يتشهر أو على عمرو دياب”.
واستكمل: “أنا راجل طبيب بشري وعضو نقابة الأطباء ومسئول تماما عما أقدمه والرقابة على المصنفات الفنية برئاسة الدكتور خالد عبد الجليل راجل محترم وعارف يوافق على إيه وميوافقش على إيه.. فمش معقول إن كلنا كده مبنفهمش وحضرتك اللي خايف على مثل المجتمع”.
وأردف: “تجارة مافيا الأعضاء في العالم كله.. فأنا واجبي وواجب الوطن وواجب الرقابة وشركتنا ومحمد رمضان لأنه مؤثر إننا نشاور على موطن الخلل ونقول إن ده خطر لازم كلنا نتلاشاه”.
فيلم “ع الزيرو” هو من بطولة محمد رمضان، نيللي كريم، جومانا مراد، إسلام إبراهيم، الطفل منذر مهران، ونخبة من نجوم الفن، ومن تأليف مدحت العدل وإخراج محمد جمال العدل.
