بمناسبة عيد الأم أسما شريف منير ترثي والدتها بكلمات مؤثرة:” كان نفسي أخدمها”
11:07 م
الأربعاء 20 مارس 2024
كتبت نوران أسامة:
بـ التزامن مع “عيد الأم”، نشرت أسما شريف منير، صورة نادرة لوالدتها على حسابها الخاص بموقع “إنستجرام”.
وعلقت قائلة: “الحقيقة يوم عيد الأم ده، يوم مؤلم أوي بالنسبالي رغم أن أمي توفت من ٢٠٠٧ يعني من ١٧ سنة، بس لسه وحشاني بفتقدها في حياتي و كنت اتمنى تكون جنبي في حاجات كتير، كان نفسي تشوف لارا”.
وتابعت: “كان نفسي أعيش معاها وتملى عليا البيت واخدمها وأدلعها زي ما عملت معايا وتعبت معايا، ربنا يرحمك يا أمي ويدخلك فسيح جناته، بس عشان ربنا كريم أنا عندي دلوقتي مش أم واحدة عندي ٥ ماشاء الله، ربنا يحفظهم و يبارك في عمرهم و يخليهم ليا العمر كله، اللي بتدافع عني و اللي بتدلعني و اللي بتحضني و اللي بتأكلني و اللي بتسأل عليا و اللي بتطبطب عليا واللي بتطمن إني كويسة، كل ست في الستات العظيمة دي، عوض كبير ليا و عيلتي و حبايبي و أهم ناس في حياتي، بحبهم من قلبي و أعمل أي حاجة في الدنيا عشان أشوفهم سعداء، بحبكم كلكم و شكراً على وجودكم في حياتي”.
استكملت: “يا رب يا لارا أكون أم صالحة ليكي ويفضل في قلبك حب ليا ولين قلبك عليا لما أكبر أو تختلفي معايا او تزعلي مني، بحبك يا نور عيني وأحلى بنت في الدنيا، كل سنة وكل أم طيبة وجدعة و جميلة و حمولة، ربنا يسعدكم ويقويكم و خليكم لأولادكم يارب”.
يذكر أن، أسما هي ابنة النجم الكبير شريف منير، وشاركته من قبل في تقديم برنامج تليفزيوني، استضافا خلاله عدد كبير من نجوم الفن، وكانت أثارت جدلا واسعا مؤخرا عقب ظهورها بعد قص شعرها بالكامل.
