أمس الجمعة ٤ أكتوبر ٢٠٢٤م أتت قوة من الدعم السريع واخبروا سكان الحي بمغادرة الحي والاتجاه للدناقلة شمال “شمال خور نصر الدين” القوة الجات وأمرت الناس بالاخلاء دي مشت البيوت الواقعة “جنوب شارع سوق الدناقلة حتى شارع الجناح الخاص” لكن ما مشو دقو البيوت الواقعة “شمال شارع سوق الدناقلة سابقًا”.
الناس بعد سمعت الخبر دا في باقي الحي حتى الما جوهم دقو ليهم بيوتهم بدو يرحلو حاجاتهم من مساء أمس الجمعة حتى صلاة الصبح فجر اليوم السبت ٥ أكتوبر ٢٠٢٤م في منظر يحز في النفس من التعب، والأرهاق والمعاناة.
اليوم تم ارجاع الناس الغادرت منازلها للحي مرة آخرى، وقالوا ليهم الكلام دا بالنسبة للناس الساكنين شمال شارع سوق الدناقلة وحتى الجناح الخاص فقط، أما باقي الناس ترجع لأنو ماف زول قال ليكم اطلعوا من هنا ..
الناس طلعت خوف من أن يحدث لهم كما حدث لبعض سكان حلة خوجلي بعد أن تم اخطارهم بمغادرة الحي نحو الدناقلة شمال واليوم التاني وجودهم لسه في الحي قاعدين تم اخراجهم بالقوة وعدم تركهم حزم أمتعتهم والمغادرة بكيس صغير فقط لكل فرد عشان كده الناس أغلبها خافت وبدت تطلع من أمس ..
⭕ سكان الحي الأن موجودين بالحي ما عدا الناس الساكنين جنوب شارع سوق الدناقلة، حتى سكان حلة خوجلي الجو من حلة خوجلي ونزلوا في الحي جنوب سوق الدناقلة تم اخراجهم للدناقلة شمال لكن الناس شمال شارع السوق موجودين ..
ربنا يحفظهم ويغطي عليهم ..
نسأل الله لهم السلامة وكل الناس في الحي بخير والحمد لله ..
المصدر: صحيفة الراكوبة
