يحيى فضل الله
لو بتعرفى
يا مسامات الأنامل
التايهه فى
حر الضهيره
قيمة الفرح
العشعش
فى مواسمنا
المطيره
و إنو احزان
القوافل
السايره فى جوف الخواطر
ما بتمنعنا المسيره
ما كنتى
لملمتى الخطاوى
و قفتى
مديتى
الاصابع
للمواغيد المثيره
و الناس بقت
حبات سبح
لا خيط بلمها
لا ترانيم العباده
و اللهفه ذاتا
عليها لهفه
و فى العيون
صبحت زياده
لى قطره
تنزل فى جموع
ضماها كوع
تمسح دموع
زاد إزدياده
لى ضوء
يغازل
نغمة الامل
المصارع
بين مسافاتنا
و بعاده
يا مسامات الانامل
مدى
في عمقك اصابعك
و شيلى
من الجوف
حرايقو
و خلى
حبك يبقى
تابعك
فى مشيك
على الجراجات
الطويله
فى حروفك
فى مسامعك
و خلى
فى أملك
عوالم
تنشرا
تغمر
كل مرابعك
المصدر: صحيفة الراكوبة
